Mögnuð sýning og upplifun í Borgarleikhúsinu - Jesus Christ Superstar

Á laugardaginn brugðum við okkur þrjár kynslóðir saman á Jesus Christ Superstar, þá frábæru rokkóperu sem er nýfarið að sýna í Borgarleikhúsinu. Sýningin var hreint út sagt frábær, mögnuð uppfærsla og geggjuð upplifun út í gegn. Það er ekki oft sem maður vill ekki að sýning endi, og ekki oft sem áhorfendur standa upp í lokin og fagna með klappi og hrópum! Ég er mikill aðdáandi verksins og hef séð þær uppfærslur sem hér hafa verið gerðar, en þessi var algjörlega frábær, enda vorum við saman þrjár kynslóðir sem allar skemmtu sér vel í sinni upplifun á verkinu. Allir sem sungu aðalhlutverkin fengu að njóta sín samkvæmt því sem hæfði þeirra hlutverki, Krummi firnagóður og trúverðugur sem Jesús og Jens feikilega sterkur sem Júdas, enda býður það hlutverk jafnan upp á mikil tilþrif. Lára var æðisleg sem María Magdalena, Ingvar sem Pílatus og Bergur sem Heródes ...og bara allir sem komu fram í sýningunni. Það skín af þeim áhuginn og vandvirknin. Og þótt gaman sé að lesa leikdóma í fjölmiðlum, þá vil ég hvetja fólk til að láta sinn eigin smekk ráða, því þetta var gæsahúð allan tímann og ég gef sýningunni 6 stjörnur af 5 mögulegum!

Athugasemdir

[Kristján Kristjánsson, 7.1.2008 kl. 19:11]

Ég er innilega sammála þessu. Þetta verk er í miklu uppáhaldi hjá mér og þessi uppsetning var kraftmikil og vel gerð :-) Bæði rokkstjörnurnar og leikarar stóðu sig með prýði og hljómsveitin með þeim betri sem hafa spilað undir leiksýningu. Ég fór að aðra sýningu verksins og áhorfendur þökkuðu fyrir sig með standandi uppklappi. Það kom mér svo mjög á óvart slakir dómar sem einhverjir gagnrýnendur gáfu uppfærslunni.

[Svala Jónsdóttir, 7.1.2008 kl. 19:49]

Gott að heyra þetta, hef einmitt séð misjafna dóma, en langar einmitt að sjá sýninguna og dæma sjálf. :)

[Gunnar Helgi Eysteinsson, 7.1.2008 kl. 20:27]

Ég er hættur að taka mark á gagnrýnendum..

[Laulau (IP-tala skráð) 10.1.2008 kl. 12:06]

Æj hvað það er gott að heyra :-)
Bæði að þú hlustar ekki á gagnrýnendur og að sýningin var góð.

[Marta B Helgadóttir, 10.1.2008 kl. 23:33]

Takk fyrir þetta. Ekki les ég leikhúsgagnrýni en tek meira mark á almennum áhorfendum.